Húsnæðisverð á höfuðborgarsvæðinu hækkaði um 1,7% í janúar sem jafngildir 20,3% hækkun á ári. Stýrivaxtahækkun Seðlabankans spilar hér stórt hlutverk en hún hefur leitt til hækkunar útlánsvaxta bankanna.
Þetta kemur fram í grein eftir Halldór Kára Sigurðarson, hagfræðing Fasteignasölunnar Húsaskjóls. Greinin birtist á Vísir.is. Mikill íbúðaskortur er og mikið þarf að byggja til að anna eftirspurninni, spilar þar flutningur fólks til landsins rullu. Framboð fer þó vaxandi og reikna má með að 3.000 fullbúnar íbúðir komi á markaðinn á þessu ári á landinu í heild en það er 40% meira framboð en í meðalári. Halldór segir:
„Frá því eftir hrun hefur fjöldi íbúa sem eru 25 ára eða eldri á hverja íbúð vaxið jafnt og þétt. Þessi þróun er ein af meginástæðunum fyrir þeim framboðsskorti sem nú ríkir. Árið 2021 markar fyrsta árið eftir hrun þar sem unnið er á skortinum. Hvort þær íbúðir sem eru í byggingu duga til að halda í við eftirspurn eða vinna á skortinum ræðst aðallega af því hverjir fólksflutningar til landsins verða.
Ef íbúum mun halda áfram að fjölga um u.þ.b. 7 þúsund manns á ári líkt og undanfarin 6 ár þá þarf að byggja um 3000 íbúðir á ári bara til að halda í við aukna eftirspurn og meira en það til að vinna á skortinum.“
Halldór segir mikilvægt að íbúðum í byggingu fjölgi næstu árin til að koma jafnvægi á markaðinn.
