Eftir því sem stríðið í Úkraínu dregst á langinn fjölgar þeim óbreyttu borgurum sem bíða bana eða særast. Úkraínska heilbrigðisráðuneytið sagði í gær að 352 óbreyttir borgarar, þar af 14 börn, hafi látið lífið síðan innrás Rússa hófst. Ráðuneytið sagði einnig að 1.684, þar af 116 börn, hafi særst.

Fyrsta látna barnið, sem yfirvöld hafa nafngreint, er Polina frá Kyiv sem var í fjórða bekk.

Sky News segir að samkvæmt Facebookfærslu Volodymyr Bondarenko, varaborgarstjóra í Kyiv, hafi Polina og foreldrar hennar verið skotin til bana af „rússneskum spellvirkjum“ (úkraínsk stjórnvöld tala oft um innrásarherinn sem spellvirkja og hernámslið) þar sem þau voru á ferð í bifreið. Bróðir Polina særðist og liggur á Okhmatdyt barnaspítalanum og systir hennar er á gjörgæsludeild annars sjúkrahúss.