Karólína Lea Vilhjálmsdóttir, leikmaður Bayern Munchen og íslenska landsliðsins, var í viðtali í þættinum Íþróttavikan með Benna Bó á Hringbraut á föstudag. Hún er nú stödd með landsliðinu í Kaliforníu þar sem það tekur þátt í SheBelieves Cup.

,,Mér líst bara mjög vel á þetta. Það er skemmtilegt að koma á mót og líka skemmtilegt að koma til Bandaríkjanna. Maður kemur ekki oft þangað,“ sagði Karólína, aðspurð hvernig mótið lægist í hana.

,,Það er alltaf jafnskemmtilegt að koma í landsleiki. Þegar maður er að spila úti er þetta eins og að koma í smá frí, að geta talað íslensku og verið í umhverfi sem manni líður mjög vel í.“

Karólína var í litlu hlutverki hjá stórliði og Þýskalandsmeisturum Bayern Munchen á síðustu leiktíð. Mínúturnar eru hins vegar að færast í aukanna. ,,Í fyrra var ég að fá lítinn sem engan tíma. Nú hefur hópurinn aðeins minnkað sem hefur hentað mér mjög vel. Ég er líka með meira sjálfstraust og er að fá meira traust núna.“

Faðir Karólínu er Vilhjálmur Kári Haraldsson, knattspyrnustjóri og fyrrum leikmaður. Hún fær góð ráð frá honum. ,,Nú hringi ég yfirleitt eftir leik. Þetta er núna yfirleitt bara pepp frá honum, ég fæ næga gagnrýni hérna úti. Hann hefur passað sig meira eftir að ég fór út að vera bara jákvæði kallinn“ sagði Karólína og nefndi að heima á Íslandi hafi hann frekar farið yfir það sem hefði betur mátt fara eftir leiki.

Karólína kann vel við sig í Munchen. Þar leikur hún með Glódísi Perlu Viggósdóttur og Cecilíu Rán Rúnarsdóttur. ,,Mér líður bara mjög vel. Mér líður bara eins og ég sé að koma heim þegar ég fer þangað (til Munchen). Glódís er alveg magnaður íþróttamaður. Það er ekkert smá gaman að hafa hana í sínu liði og læra af henni.“

En hvernig gengur að læra þýsku? ,,Ég mætti alveg vera betri. Ég svosem skil alveg allt, þarf bara að tala meira.“

Bayern mætir Paris Saint-Germain í Meistaradeild Evrópu í næsta mánuði. Leikið verður á Allianz-arena, leikvanginum sem karlalið Bayern notar almennt. ,,Þetta er ekkert smá spennandi. Ég hef farið að horfa á nokkra leiki og það er svo geggjað andrúmsloft þarna. Vonandi koma sem flestir og vonandi fáum við einhverja íslenska stuðningsmenn líka.“

Hvað SheBelieves Cup varðar er Karólína spenntust fyrir því að leika gegn Bandaríkjunum. ,,Það verður extra skemmtilegt að spila á móti Bandaríkjunum. Eru þessi aðdáendur hérna ekki smá sérstakir?“