Guðmundur Ingi Þóroddsson, frambjóðandi í prófkjöri Samfylkingarinnar sem hefst í fyrramálið, laugardagsmorgun, verður ekki á kjörseðlinum eftir allt. Þetta er niðurstaða úrskurðarnefndar Samfylkingarinnar sem gerð var kunn fyrr í kvöld.
Áður hafði kjörstjórn Samfylkingarfélagsins í Reykjavík komist að sömu niðurstöðu í morgun, en Guðmundur kærði þá niðurstöðu til fyrrnefndrar úrskurðarnefndar.
Guðmundar segir frá vendingunum inni á lokuðum stuðningsmannahópi hans á Facebook. Úr færslunni má jafnframt lesa að niðurstaðan sé endanleg, og að óvíst sé hvort „samlíf“ hans og Samfylkingarinnar geti átt sér framhald eftir atburði dagsins.
Guðmundur gaf kost á sér á lista flokksins fyrir Alþingiskosningarnar í vor, en var meinað um sæti vegna stöðu hans innan fangelsiskerfisins. Guðmundur er á reynslulausn, og er tekist á um það hvort hann hreinlega megi, samkvæmt kosningalögum, bjóða sig fram. Eitt skilyrðanna þar er að menn hafi óflekkað mannorð, án þess að farið sé dýpra í þá sálma í kosningalöggjöf.
Guðmundur sagði jafnframt í færslunni það vera vonbrigði að Samfylkingin hafi ekki leyft sér að spreyta sig og að leyfa þá jafnvel dómstólum að skera úr um það í eitt skipti fyrir öll hvort menn á reynslulausn þykja hafa lokið afplánun og hafa þá óflekkað mannorð, í skilningi laganna.
Í vikunni voru sagðar fréttir af miklum nýskráningum í Samfylkinguna í aðdraganda prófkjörsins og var stór hluti þeirra rakin til framboðs Guðmundar.
Í fyrrnefndri færslu skrifar Guðmundur:
Það er líka sárt að fá þessi tíðindi svona kvöldið áður en prófjörið hefst enda hafði Ásta Guðrún Helgadóttir, formaður kjörstjórnar, sagt mér að kjörgengi mitt hefði verið rætt innan flokksins. Ekki væri lengur um það deilt að ég væri kjörgengur. En vegna ábendingar sem kjörstjórn barst núna í vikunni virðist eitthvað hafa breyst í hugum kjörstjórnar síðan hún tók framboð mitt gilt á fundi kjörstjórnar 22. janúar. Kannski dugnaður okkar sem fjallað hefur verið um í fjölmiðlum.
Sem fyrr segir opnar fyrir atkvæðagreiðslur í fyrramálið og eru kjörstaðir opnir fram á sunnudag kl. 3. Kosið er rafrænt.
