„Þetta kom mjög á óvart. Við rannsökuðum blóðsýni aftur til desember til að vera viss um að fara nægilega langt aftur í tíma. Við áttum því ekki von á að fá jákvæða svörun svona snemma,“ er haft eftir Anne Eskild, verkefnastjóra rannsóknarinnar, í fréttatilkynningu sem var birt á heimasíðu Ahus.
Fyrsta tilfelli kórónuveirunnar í Evrópu hefur fram að þessu verið talið hafa verið staðfest 27. janúar 2020 og fyrsta staðfesta tilfellið í Noregi var 24. febrúar 2020.
Blóðsýnið, sem vísindamennirnir við Ahus fundu mótefnið í, er frá því á sama tíma og fyrsta tilfelli veirunnar var staðfest í Kína.
Blóðsýnin, sem voru rannsökuð, voru tekin úr barnshafandi konum á Ahus frá því í desember 2019 fram í desember 2020. Blóðsýni eru tekin úr öllum barnshafandi konum í Noregi til að rannsaka hvort þær séu með sýfilis. Sýnin eru síðan geymd í því skyni að hægt sé að rannsaka þau síðar ef þörf þykir vegna eftirlits með smitsjúkdómum.
Vísindamennirnir rannsökuðu blóð úr 6.520 konum og var mótefni gegn kórónuveirunni í 98 sýnum. Vísindamennirnir segja að reikna megi með að einhver hluti svaranna hafi verið falskur en allt bendi samt sem áður til að veiran hafi verið komin til Noregs 2019.
