Maður sem ákærður er fyrir að hafa nauðgað konu snemma í haust hefur verið úrskurðaður í farbann til 21. febrúar. Hann kærði úrskurð héraðsdóms um þetta til Landsréttar sem staðfesti úrskurð héraðsdóms.
Maðurinn er sakaður um að hafa haft samræði við konu án hennar samþykkis á heimili sínu í Reykjavík þann 19. september. Er hann sagður hafa haft samræði við hana og sleikt kynfæri hennar þar sem hún lá illa áttuð í sófa á heimili hans og notfært sér að hún gat ekki spornað við verknaðnum vegna ölvunar.
Ákæra var gefin út á hendur manninum af hálfu héraðssaksóknara þann 22. desember. Hann hefur áður verið settur tímabundið í farbann og ávallt kært úrskurðina sem hafa verið staðfestir. Samkvæmt úrskurðinum á hann að vera í farbanni til 21. febrúar en þó ekki lengur.
Úrskurðurinn var kveðinn upp síðastliðinn föstudag.
