Met var sett í útflutningi á tekíla frá Mexíkó á síðasta ári. Alls voru 339 milljónir lítra fluttir út og hefur magnið aldrei verið meira síðan skráning hófst 1995.

TV2 skýrir frá þessu. Fram kemur að opinberar tölur sýni þetta og nemi aukningin 18% frá árinu á undan. Þetta er mesta aukningin á milli ára í 12 ár.

Megnið fór til Bandaríkjanna eða 288 milljónir lítra. Því næst var það Þýskaland en þangað fóru 6,5 milljónir lítra.

Aðeins má markaðssetja tekíla sem er framleitt í Jalisco-ríki og hlutum Tamaulipas, Michoacan, Guanajuato og Nayari sem ekta tekíla.