Sveitarstjórn Húnaþings vestra samþykkti á dögunum að hefja hópfjármögnun vegna endurbóta á Vatnsnesvegi. Ákvörðunin þykir um margt merkileg, enda ekki vitað til þess að hópfjármögnunarsíður hafi verið nýttar með þessum hætti af opinberum aðilum áður. Til stendur að safna eitt hundrað milljónum króna, eða 666 þúsund evrum, og höfðu þegar þetta er skrifað 180 evrum verið ánafnað.

Þetta kemur fram á heimasíðu Húnaþings vestra og á söfnunarsíðunni á Karolina Fund.

Fréttavefurinn Trölli greind frá.

Í bókun sem samþykkt var á fundi sveitarstjórnar Húnaþings vestra segir að nauðsynlegt sé að flýta framkvæmdum við veg nr. 711, Vatnsnesveg vegna mjög slæms ástands hans sem hefur veruleg áhrif á lífsgæði þeirra sem búa á Vatnsnesi. Þar segir jafnframt að vegurinn sé á samgönguáætlun en ekki fyrr en á tímabilinu 2030-2034. Áætlað er að kostnaðurinn við veginn verði 3,5 milljarðar.

Hundrað milljónirnar sem sveitarfélagið hyggst hópfjármagna eru þannig aðeins hugsaðar til þess að „koma hönnun strax af stað,“ að því er segir í bókuninni.

Fjölmörg slys hafa orðið á veginum undanfarin ár og sagði DV meðal annars frá því árið 2016 að ófremdarástand ríkti og að aðeins væri tímaspursmál hvenær alvarlegt slys bæri að á veginum. Frá því það var skrifað hafa fjölmörg slys orðið á veginum og sum þeirra alvarleg.

Sjálfsagt eru þeir nokkrir sem myndu segja raunveruleg ætlun sveitarstjórnarinnar með uppátækinu að vekja athygli á ástandi vegarins, frekar en að koma framkvæmdum af stað. Ef það er raunin verður sjálfsagt að hrósa sveitarstjórn Húnaþings vestra, enda tekist ætlunarverk sitt.

Hægt er að veita söfnunni lið á heimasíðu verkefnisins hér.