„Ég er sammála gagnrýninni sem fram hefur komið að þetta var þunnt, þessi rannsóknarblaðamennska – hvar var hún? Þetta var bara viðtal við Þóri Sæmundsson. Margt sem hann sagði truflaði mig, mér fannst þetta ekki alveg standast allt saman. Eins og það er mikilvægt að við getum farið að taka þessa umræðu af einhverju viti, þá fannst mér þetta ekki endilega vera neitt innlegg í það,“ sagði Jakob Bjarnar Grétarsson, blaðamaður á Vísir.is, er hann fór yfir fréttir vikunnar á Bylgjunni í morgun.

Hringbraut tók saman viðtalið við Jakob. Hann segir að meginspurningu Kveiks-þáttarins hafi ekki verið svarað, nefnilega þessari: Hvenær eiga gerendur að eiga afturkvæmt út í samfélagið?

Jakob Bjarnar hefur verið mjög gagnrýninn á aðferðir og orðræðu margra aktivista sem berjast gegn kynferðisbrotum. Hann segist verða mjög reiður þegar hann er sakaður um að verja níðinga vegna þess að hann gagnrýnir aðferðir hópa á borð við t.d. Öfga: „Það er ekki hægt að fallast á það að þessar aðferðir sem ég nefni, og það að maður vilji gagnrýna þær eða allavega setja spurningarmerki við þær, jafngildi því að þá sé maður farinn að verja níðinga. Þá verð ég bara reiður. Það er ekki hægt að bjóða mér né nokkrum öðrum upp á þetta,“ segir Jakob.

Hann heldur því blákalt fram að aðferðir baráttuhópanna og pólarísering umræðunnar hafi slæm áhrif á baráttuna gegn kynferðisbrotum:

„Þarna er verið að tvískipta hópnum. Við eigum öll að vera saman í því að takast á við þetta. En það er annað hvort „my way or the highway.“ Ef þú gagnrýnir aðferðina, þá ertu á móti markmiðinu. Tilgangurinn helgar ekki meðalið. Þetta er fúndemental atriði í gagnrýnni hugsun. 

Það er ömurlegt þegar verið er að rugla saman tilgangi og meðali. Þegar maður segir „bíddu, þetta er nú kannski ekki alveg eins og Sigurður G. er að gera. Þetta gengur nú ekki alveg upp, að vera úthrópa menn án dóms og laga. Að hann sé þá allt í einu orðinn einhver vildarvinur nauðgara. Mér finnst þetta bara ekki standast lágmarks rökfræðilega skoðun.“

Jakob minnir á að hann og hans fjölskylda hafi ekki farið varhluta af kynferðisbrotum en dóttur hans var nauðgað fyrir nokkrum árum:

„Það sem mér finnst verst, og ég hef ekki farið varhluta af þessum viðbjóði sem eru nauðganir. Ég hef svo sem sagt það áður og ég hef fengið leyfi dóttur minnar til að greina frá því að henni var nauðgað þar sem hún var við nám í Bandaríkjunum. Skelfilegt mál. Við vorum í sárum öll fjölskyldan. Ekki það að ég ætli að fara vorkenna sjálfum mér, en þetta tók mjög á. Ég get alveg sagt ykkur það.

En það sem mér finnst verst, og þá verð ég bara svolítið reiður sko, að mér finnst þessi hópur vera að stórskaða réttindabaráttu gegn nauðgunum. Mér finnst að með þessum látum og afarkostum verið að veita þeim óbermum hreinlega rými og jafnvel í einhverjum tilfellum verið að veita þeim sem þarna hafa verið að fremja þessa ömurlegu glæpi einhvers konar samúð og meðaumkun, meðan við vitum ekki betur.“