Ný tækni sem gerir okkur kleift að finna plánetur sem hafa ekki fundist fram að þessu gæti komið að gagni við að skera úr um hvort líf sé að finna utan jarðarinnar.

Alþjóðlegur hópur vísindamanna notar Low Frequency Array loftnetskerfið, sem er í Hollandi, til að hlusta eftir útvarpsbylgjum frá 19 fjarlægum rauðum dvergstjörnum. Þetta er öflugasta loftnetskerfið á jörðinni.

The Guardian segir að frá fjórum af þessum rauðu dvergstjörnum berist merki sem benda til að plánetur séu á braut um þær. Benjamin Pope, stjarneðlisfræðingur við University of Queensland í Ástralíu, segir að þessi uppgötvun opni „gjörsamlega ný tækifæri“ til að rannsaka fjarplánetur þar sem líf getur hugsanlega þrifist.

Niðurstöður rannsóknarinnar hafa verið birtar í vísindaritinu Nature Astronmy.

Joseph Callingham, stjórnandi rannsóknarinnar, segir að teymið telji öruggt að merkin komi frá rafsegultengingu á milli stjarnanna og áður óséðra pláneta sem séu á braut um þær.

Þegar Pope var spurður hvort hann telji að líf sé aðeins að finna hér á jörðinni sagði hann: „Ég held að það sé líf þarna úti. Ég væri ekki í þessari vinnu ef ég héldi ekki að það séu raunhæfir möguleikar á því,“ sagði hann og bætti við að hann telji að við fáum svar við þessu innan ekki svo langs tíma.