Klukkan 19:21 í kvöld voru björgunarsveitir á Suðurlandi kallaðar út. Ástæða útkallsins var sú að neyðarlínu barst tilkynning um bíl sem var fastur á Mælifellssandi rétt norður af Mýrdalsjökli. Frá þessu segir í fréttabréfi frá björgunarsveitinni.

Þrír voru í bílnum og voru á vesturleið um hálendið þegar bíllinn festist í snjó. Lélegt símasamband var á svæðinu og þurfti fólkið því að ganga nokkurn spöl til að komast í símasamband svo hægt væri að kalla eftir hjálp.

Þegar komið var samband var það þó slitrótt. Það var því ekki vitað hvort áætlaða staðsetningin sem gefin var upp hafi átt við staðsetningu fólksins eða bílsins. „Þess vegna voru kallaðar út nokkrar björgunarsveitir og þær sendar á Mælifellssand úr tveimur áttum, þar sem talin var möguleiki á því að fólkið væri ekki við bílinn og að leita þyrfti að því,“ segir björgunarsveitin um málið.

„Núna rétt upp úr níu kom björgunarsveitarfólk að bílnum og fann alla þrjá um borð í bílnum, verið er að draga bílinn úr snjónum og mun björgunarsveitarfólk fylgja hópnum til byggða í austurátt.“