Samúel Samúelsson, formaður meistaraflokksráðs Vestra hefur fulla trú á því að Jón Þór Hauksson skrifi undir nýjan samning við félagið og stýri því á næsta tímabili. Jón Þór er þegar farinn að undirbúa næsta tímabil hjá liðinu.

„Ég tel að ef við náum að halda í sama kjarna og á nýafstöðnu tímabili að Jón Þór verði áfram þjálfari Vestra,“ sagði Samúel í samtali við 433.is og þá ályktun má draga út frá þeim orðum að lykillinn í að halda í Jón Þór felist í því að lykilmenn liðsins verði áfram í herbúðum Vestra.

Jón Þór er eftirsóttur af mörgum liðum á landinu og Samúel segist vita af þeim áhuga. „Ég veit að lið hafa sett sig í samband við Jón Þór en ég er bjartsýnn á að hann skrifi undir hjá Vestra og að við förum upp í efstu deild að ári,“ sagði Samúel Samúelsson, formaður meistaraflokksráðs Vestra.

Jón Þór telur allar líkur á því að hann muni skrifa undir nýjan samning hjá Vestra. „Eins og staðan er núna þá sit ég fyrir framan tölvuna mína og er að undirbúa næsta tímabil með Vestra,“ sagði Jón Þór í samtali við 433.is fyrr í dag.

Jón Þór samdi við Vestra í júlí á þessu ári og gerði samning út tímabilið. Hann tók við liðinu er það var í 6. sæti Lengjudeildarinnar og skilaði því í 5. sæti í lok tímabils. Þá komst Vestri einnig í undanúrslit Mjólkurbikarsins þar sem liðið lagði til að mynda þáverandi Íslandsmeistara Vals að velli. Undir stjórn Jóns Þórs vann Vestri átta leiki af fjórtán.