Jóhann Skagfjörð Magnússon, skólastjóri Garðaskóla, gerði sér ferð til að kjósa í alþingiskosningunum og með honum í för var 3 mánaða gamall sonur hans. Þegar komið var að því að kjósa ætlaði Jóhann sér að taka son sinn með sér inn í kjörklefann en það mátti hann ekki gera.
Þegar komið var að kjörklefanum var Jóhanni skipað að skilja son sinn eftir fyrir utan kjörklefann á meðan hann stimplaði bókstaf flokksins sem hann ætlar að kjósa á blað. Jóhann greindi frá þessu í færslu sem hann birti á Twitter-síðu sinni í gær en færslan vakti töluverða athygli.
Kaus í gær. Var með 3 mánaða son minn með mèr. Var skipað að skilja hann eftir fyrir utan kjörklefann meðan èg stimplaði kjörseðilinn. Spes vinnubrögð. #kosningar2021
— Jóhann Skagfjörð (@joiskag) September 22, 2021
„Ég var ekkert að „challeng-a“ þetta eitthvað mikið á þessum tíma. Ég nennti þessu ekki enda var sonurinn alveg góður og svona, ef hann hefði verið grátandi eða eitthvað þá hefði ég kannski gert það,“ segir Jóhann um málið í samtali við DV. „Þegar ég fór inn í þetta tjald til að stimpla þá þurfti ég að skilja hann eftir þar fyrir utan. Það var alveg skýrt tekið fram, að það mætti bara vera einn í einu í kjörklefanum.“
Þrátt fyrir að vera sonur skólastjóra þá er þriggja mánaða gamli sonur Jóhanns ennþá ólæs og því ólíklegt að hann færi að hafa áhrif á stjórnmálaskoðanir föður síns, hvað þá að hann fari að dreifa þeim. „Það er gríðarlega ólíklegt, hann er ekki svona mikið undrabarn.“
