Nora Mehsen er 29 ára norsk kona. Margir virðast telja sig eiga eitthvað sökótt við hana og henni berast oft líflátshótanir og/eða hótanir um ofbeldi. Henni hefur verið hótað að réttast sé að grýta hana til bana og aðrir óska þess að hún muni brenna í helvíti. Ástæðan fyrir þessu er að hún er samkynhneigð, hún múslimi, hún er af innflytjendaættum og hún hefur verið dugleg við að tjá sig í opinberri umræðu um umburðarlyndi og að fólk eigi að samþykkja þá sem eru öðruvísi, minnihlutahópa.

Þetta virðist hafa orðið til þess að mörgum er mjög í nöp við hana, beinlínis hata hana.

Ég hef fengið morðhótanir. Þetta eru hótanir um að það eigi að grýta mig til bana eða að ég eigi að brenna í helvíti, að ég eigi ekki skilið að lifa og að heimurinn verði betri án mín.

Sagði hún í samtali við TV2.

Það að hún er af innflytjendaættum vekur reiði margra. Múslima, innflytjenda, Norðmanna af báðum kynjum og fleiri.

Ég lifi við ákveðna óvissu – maður veit aldrei hvort það er einhver sem vill manni eitthvað illt. Ég veit ekki hvort ég þarf að óttast eitthvað en það hefur áhrif á þig þegar það eru svo margir sem hata þig. Þegar ég fæ bréf, sem er handskrifað, er fyrsta hugsun mín að það sé morðhótun.

Aðspurð sagðist hún reikna með að verða hótað vegna umfjöllunar TV2 um málið.

Já, því miður verð ég að reikna með því. Þetta er gjaldið sem ég og margir eins og ég – konur, fólk af innflytjendaættum, múslimar – greiða fyrir að taka þátt í þjóðmálaumræðunni. En heiftin í þessu er í sjálfu sér staðfesting á að það sé mikilvægt að ég láti heyrast í mér.