Forseti Bandaríkjanna, Joe Biden, hefur kallað eftir afsögn ríkisstjóra New York, Andrew Cuomo, eftir að ítarlegar niðurstöður rannsóknar á meintu framferði Cuomos gegn konum voru kynntar í gær en samkvæmt rannsókninni er Cuomo sekur um kynferðislega áreitni gegn ellefu konum.

Biden tjáði sig um málið fyrir utan Hvíta húsið í gær. „Ég held að hann ætti að segja af sér. Ég skil það svo að löggjafar ríkisins [New York ríki] gætu ákveðið að sækja hann til saka. Ég veit það þó ekki fyrir víst, ég er ekki búinn að lesa öll gögnin“ sagði Biden aðspurður um hvað gæti gerst ef Cuomo segði ekki sjálfviljugur af sér, en Cuomo gaf frá sér yfirlýsingu í gær þar sem hann vísaði ásökununum á bug og sagðist ekki ætla sér að segja af sér embætti ríkisstjóra sem hann hefur gengt síðan árið 2011.  Eðlilega hafði Biden ekki náð að kynna sér niðurstöður rannsóknarinnar til hins ítrasta en þær eru afar umfangsmiklar, telja heilar 168 blaðsíður og byggja meðal annars á samtölum við 179 einstaklinga, þeirra á meðal konurnar ellefu sem segja Cuomo hafa brotið gegn sér með áreitni á borð við þukl, kossa, niðrandi og kynferðislegum athugasemdum í þeirra óþökk.

Cuomo er demókrati og hafa mörg valdamikil flokkssystkini hans kallað eftir afsögn hans.