Dean Henderson missir af æfingabúðum Man United í Skotlandi en markvörðurinn er að ná sér af Covid-19. Þessi 24 ára gamli Englendingur smitaðist af veirunni fyrir þremur vikum síðan. Félagið gaf út yfirlýsingu þess efnis að Henderson hrjáist af langvarandi þreytu vegna veirunnar.
Henderson er búinn að ná sér af mjaðmameiðslum sem urðu til þess að hann missti af EM 2020. Man United átti að leika æfingaleik gegn Preston North End á laugardaginn en leiknum var frestað vegna gruns um smit innan herbúða þeirra rauðklæddu.
Hópurinn mætti hins vegar aftur á æfingu á föstudaginn eftir að í ljós kom eftir svokallað PCR próf að enginn leikmaður liðsins reyndist smitaður.
United segir ekki langt í að Henderson mæti aftur á æfingar. David de Gea er hins vegar kominn aftur eftir landsliðsskyldur sínar með Spáni á EM 2020 og bætist í leikmannahópinn í Skotlandi.
