Alphabet, sem er móðurfyrirtæki netrisans Google, hagnaðist vel á síðasta ársfjórðungi og hefur hagnaður fyrirtækisins aldrei verið meiri á einum ársfjórðungi. Google er aðaltekjulind fyrirtækisins. Samtals var hagnaðurinn 19,4 milljarðar dollara á öðrum ársfjórðungi samkvæmt uppgjöri sem fyrirtækið birti á þriðjudaginn.

Þetta er þrisvar sinnum meiri hagnaður en á fyrsta ársfjórðungi. Fjárfestar höfðu gert sér miklar vonir um afkomu tæknirisanna Google, Microsoft og Apple og virðast þær væntingar hafa gengið eftir.

Gengi hlutabréfa í Alphabet hefur næstum því fjórfaldast á síðustu fimm árum og þeir sem keyptu hlutabréf strax í upphafi árið 2004 hafa séð verðmæti hlutabréfa sinna aukast um 5.300 prósent.