Vopnaðir menn halda enn friðlandi í Oregon-ríki – Lögreglan skaut einn til bana í nótt
Lögregluyfirvöld í Bandaríkjunum hafa handtekið Ammon Bundy, forsprakka hóps vopnaðra manna sem hernam friðland í Oregon-ríki. Hernáminu er þó ekki lokið því fylgjendur Bundy hafa svæðið enn á sínu valdi, þrátt fyrir að vera umkringdir af lögreglu.
Frá þessu er greint á vef BBC í morgun en þar segir að lögreglan hafi handtekið Bundy og fjóra fylgjendur hans í gær, þegar þeir voru stöðvaðir við umferðareftirlit. Einn þeirra særðist í aðgerðum lögreglunnar.
Þá voru þrír aðrir handteknir í aðskildum aðgerðum lögreglunnar og einn skotinn til bana.
Hópurinn komst í heimsfréttirnar 2. janúar síðastliðinn þegar hann hernam náttúruverndarsvæði í Oregon. Með hernáminu er hópurinn að mótmæla handtöku tveggja bænda, sem eru nú í fangelsi fyrir að brenna sinubruna á landi í eigu ríkisins.
Sjá einnig: Landsvæði í Oregon hernumið af vopnuðum mönnum
Hópurinn segir að ríkisstjórnin hafi áratugum saman stolið landi af bændum. Því hernámu þeir náttúruverndarsvæðið svo að bændur gætu flutt þangað og ræktað landið án afskipta ríkisstjórnarinnar.
Þrátt fyrir að forsprakki hópsins sé nú í haldi, búið sé að handtaka nokkra úr hópnum og einn sé látinn, er svæðið enn hernumið af hópnum. Fylgjendur Bundy eru enn á Malheur National Wildlife-friðlandinu og segjast ekki ætla að fara.
Alríkislögregla Bandaríkjanna, FBI, hefur nú lokað svæðið af og er hópurinn umkringdur.