Kona ein var í dag sakfelld í Héraðsdómi Reykjaness fyrir að hafa stolið samtals 461 þúsund krónum af Foreldrafélagi Njarðvíkurskóla.

Var hún sökuð um að hafa í starfi sínu sem gjaldkeri félagsins dregið sér þetta fé í samtals 20 millifærslum. Hæstu millifærslurnar námu 30 þúsund krónum og þær lægstu 5 þúsund kalli.

Konan játaði brot sín skýlaust og hefur endurgreitt allt féð. Í ljósi þess, sem og þess að ákæra var gefin út tveimur árum eftir afbrotið án þess að konan bæri nokkra sök á þeirri töf, ákvað héraðsdómur að gera konunni enga refsingu, með þeim hætti að ákvörðun refsingar er frestað skilorðsbundið í tvö ár frá birtingu dómsins. Það þýðir að ef konan brýtur ekki að sér næstu tvö árin verður henni ekki gerð nein refsing í þessu máli.