Meðlimir hljómsveitarinnar Sigurrósar voru nýlega sýknaðir fyrir Héraðsdómi Reykjavíkur í nokkuð umfangsmiklu skattsvikamáli. Málið hafði legið eins og mara á tónlistarmönnunum sem töldu sig ekkert hafa til sakar unnið. Sýknudómurinn var því mikill léttir fyrir þá, fjölskyldur þeirra og vini.
En því miður fyrir Sigurrós er málinu ekki lokið. Ríkissaksóknari hefur ákveðið að áfrýja því til Landsréttar sem gæti snúið dómnum við.
Tónlistarmaðurinn Pétur Ben er ákaflega ósáttur við þessa meðferð á vinum hans í hljómsveitinni Sigurrós. Hann bendir á hvað Sigurrós og heimsfrægð hennar hefur haft jákvæð áhrif á ímynd landsins og spyr hvort þetta sé þakklætið.
Þetta kemur fram í opinni Facebook-færslu hjá Pétri þar sem hann segir:
„TAKK!
Nú hefur ákæruvaldið ákveðið að áfrýja sýknudóm Sigur Rósar til Hæstaréttar. Sem er alveg snarrugluð ákvörðun. Dómarinn sagði það beinlínis við saksóknara að illa væri farið með almannafé að halda þessu máli gangandi af því að það er búið að gera upp allar skuldir, sektir og málskostnað. Það að halda þessum mönnum og fjölskyldunum þeirra í heljargreipum er bara ofbeldi. Það er eins og þetta sé persónulegt mál fyrir einhvern í ákæruvaldinu. Fyrir hvern eruð þið að vinna?
Réttarkerfið okkar getur ekki verið stætt af því að eyða fjármunum þjóðarinnar í þessa vitleysu.
Ekkert fyrirtæki hefur haft meiri áhrif á jákvæða ímynd Íslands og íslensku náttúrunnar enSigurrós sem hefur skilað gríðarlegum tekjum inn í hagkerfið á undanförnum árum.
Er það svona sem við segjum TAKK?“
