Chelsea ætlar að losa sig við Hakim Ziyech í sumar eftir aðeins eitt tímabil hjá félaginu. Ýmis félög á Ítalíu eru áhugasöm um kappann.

Ziyech gekk til liðs við Chelsea frá Ajax síðasta sumar og spilaði leikmaðurinn 39 leiki fyrir félagið á leiktíðinni. Leikmaðurinn skoraði 6 mörk á leiktíðinni og gaf fjórar stoðsendingar. Þrátt fyrir það átti hann erfitt með að fá fast byrjunarliðssæti hjá Chelsea eftir að Thomas Tuchel tók við stjórninni.

Hann fékk ekki tækifæri í undanúrslitunum gegn Real Madrid í Meistaradeild Evrópu og það sama átti við um úrslitaleikinn gegn Manchester City þegar Chelsea tryggði sér Evrópumeistaratitilinn.

Samkvæmt Calciomercato hafa Napoli og AC Milan mikinn áhuga á leikmanninum og ætla sér að bjóða í hann á næstunni.

Sportsmail segir frá því að Chelsea ætli sér stóra hluti á félagsskiptamarkaðnum í sumar og mun Tuchel reyna að losa sig við að minnsta kosti ellefu leikmenn, þar á meðal Tammy, Barkley, Gilmour, Loftus-Cheek og fleiri.