Arnar Þór Viðarsson landsliðsþjálfari Íslands ætlar að eiga samtali við Ragnar Sigurðsson á næstu vikum. Ragnar yfirgaf landsliðið í núverandi verkefni vegna persónulegra ástæðna.

Ragnar er án félags og hefur ekki spilað með félagsliði frá því í mars. Óvíst er hvaða skref Ragnar tekur á ferli sínum og þá hafa kjaftasögur verið á kreiki um að hann gæti hreinlega lagt skóna á hilluna.

„Við erum búnir að vera á fullu í þessu verkefni, við lögðum upp í þetta verkefni saman með Ragga. Við töluðum mikið við hann fyrir verkefnið,“ sagði Arnar á fréttamannafundi í dag.

Ragnar fagnar 35 ára afmæli sínu síðar í þessu mánuði. „Hann þarf að finna út úr því hvar hans framtíð er, það er erfitt að segja fyrir mig hvernig sú staða er. Eina sem ég get sagt er að þegar Raggi er 100 prósent og er að spila sinn fótbolta sem hann getur best, þá er hann einn af okkar bestu miðvörðum.“

„Ég vona að Raggi finni sér lið og komi sér í stand, komi sér í sitt gamla form. Hvað gerðist er ómögulegt fyrir mig að segja, ég hef samband við hann eftir gluggann og ræði málin við hann.“