Mikið er af rusli í geimnum, allt frá stórum gervihnöttum, sem eru stjórnlausir, niður í litla hluti, sem geta verið styttri en einn cm. Allt er þetta komið frá gervihnöttum og eldflaugum sem eru notaðar til að skjóta þeim á braut. Nýlega lenti geimrusl á Alþjóðlegu geimstöðinni (ISS) og gerði gat á vélmennið Canadarm2 sem er í raun „handleggur“ utan á geimstöðinni.

Bandaríska geimferðastofnunin NASA og kanadíska geimferðastofnunin CSA skýrðu frá þessu nýlega. Tjónið uppgötvaðist 12. maí síðastliðinn. Þetta er ekki í fyrsta eða síðasta sinn sem ISS verður fyrir geimrusli og skemmist. Það auðveldar ekki málið að erfitt er að sjá fyrir hvenær geimrusl lendir á ISS en það getur valdið miklu tjóni en sem betur fer var um lítið stykki að ræða að þessu sinni. Vélmennið er enn virkt.

Hluturinn sem lenti á ISS var undir 10 cm á lengd og því var ekki hægt að fylgjast með því á ratsjám. En svona lítið stykki getur valdið miklu tjóni því þau eru á um 25.000 km/klst og geta því farið í gegnum málmplötur. ISS er því með sérstakar varnir víða, auka veggi sem eiga að draga úr líkunum á að geimrusli fari alveg í gegn um ytri veggina.

Hættulegasta geimruslið er það sem er stærra en 10 cm en um 34.000 slíkir hlutir eru á braut um jörðina. Fylgst er með 28.600 af þessum hlutum. Hlutir, sem eru á milli 1 og 10 cm, eru um 900.000. Þegar kemur að hlutum sem eru minni en 1 cm er magnið gríðarlegt eða 128 milljónir.