Daði og Gagnamagnið stigu á svið í Rotterdam í dag á fyrstu æfingunni fyrir lokakeppnina sem hefst seinna í mánuðinum. Eftir æfinguna rauk atriðið upp lista veðbankanna og eru Daði og Gagnamagnið nú númer fjögur á lista hjá þeim. Atriðið er sagt hafa 9% sigurlíkur sem verður að teljast nokkuð gott.
Það eru aðeins þrjú atriði fyrir ofan Daða hjá veðbönkum en það eru atriði Frakklands, Möltu og Sviss. Frakkar eru sagðir eiga 18% líkur á að sigra og tróna topp listans.
Frakkland – Barbara Pravi – Voilà
Það er hin 28 ára Barbara Pravi sem keppir fyrir hönd Frakka með laginu „Voilà“ en lagið fjallar um konu sem hefur falið sig í skugganum of lengi og baðað sig í óöryggi og skömm sem fylgir því að lifa hljóðlaust.
Í gegnum lagið fylgjumst við með konu sem fer úr óöryggi yfir í að vera sterk og úr sjálfsvafa yfir í að samþykkja sjálfa sig. Barbara tengir sjálf mikið við textann sem er eftir hana sjálfa og Lili Poe en hún hefur þurft að fara í gegnum heimilisofbeldi.
Malta – Destiny – Je Me Casse
Í öðru sæti hjá veðbönkum er Malta en framlag þeirra ber nafnið „Je Me Casse“ og er sungið af Destiny. Destiny er maltnesk og er fædd í ágúst árið 2002 sem þýðir að hún er aðeins 18 ára gömul.
Þó svo að titill lagsins sé á frönsku þá er lagið sungið á ensku. Titill lagsins beinþýddur er „Ég brotna“ en Je Me Casse er franskt orðatiltæki sem merkir „Ég þarf að fara“ eða „Ég er farin“. Lagið fjallar um femínisma og valdeflingu kvenna og segir Destiny okkur sögu manni sem er að reyna við konu með því að kaupa handa henni drykki og segja bólbeitur (e. pick-up line). Konan vill þó ekkert með hann hafa og vill bara dansa og hafa gaman.
Sviss – Gjon’s Tears – Tout l’Univers
Lagið sem veðbankar spá þriðja sætinu kemur frá Sviss og heitir Tout l’Univers eða „Allur alheimurinn“. Lagið er sungið af hinum 22 ára Gjon’s Tears en hann er svissneskur með ættir að rekja til Kósóvó og Albaníu. Lagið er einstaklega fallegt og sat á toppi veðbanka í langan tíma.
Lagið fjallar um að alast upp í heimi sem getur verið tómur, harkalegur og kaldur. Hann syngur um hversu erfitt það er að tína upp púsl úr farangri erfiðs lífs. Með textanum vill hann meina að allir ættu að taka áhættuna á að elska aftur, þrátt fyrir að vera særð úr fyrri samböndum.
Daði og Gagnamagnið syngja á síðara undanúrslitakvöldi Eurovision þann 20. maí næstkomandi. Skuli þau komast áfram keppa þau á úrslitakvöldinu þann 22. maí en það verður að teljast ansi líklegt miðað við stöðu lagsins í veðbönkum.
