Björgunarsveitir við gosstöðvarnar í Geldingadölum eru nú að rýma svæðið allra næst gosstöðvunum. Er það gert bæði vegna aukinnar gasmengunnar og gjóskufalls á gossvæðinu. Vísir greindi frá.
Þrátt fyrir að verið sé að rýma svæðið næst gosinu er ekki verið að loka alveg fyrir allt svæðið. Gjóska og litlir hraunmolar hafa verið að falla yfir þá sem eru á svæðinu. Molarnir sem um ræðir eru sagðir vera um 2-3 sentímetrar í þvermál. Samkvæmt upplýsingum sem Vísir hefur frá gosstöðvunum var kona að gefa ungu barni brjóst á gossvæðinu þegar gjóskan féll yfir.
Fyrr í dag barst tilkynning frá Veðurstofu Íslands en þar kom fram að miklar breytingar hafi orðið á gosvirkni á svæðinu í nótt. „Kvikustrókavirkni sem hafði verið nokkuð stöðug undanfarna daga tók að sveiflast með þeim hætti að hún dettur niður í um 3 mínútur og eykst svo með miklum krafti með hærri strókum en áður hafa sést og stendur yfir í um 10 mínútur. Þessir taktföstu púlsar hafa einkennt gosið frá því klukkan 1 í nótt,“ segir í tilkynningunni um breytingarnar.
„Ekki er ljóst hvað veldur þessum breytingum í gosvirkni, en ekki er hægt að útiloka að breytingar hafi orðið í kvikuflæði, efnasamsetningu kviku/gass eða að breytingar hafi orðið í aðfærslukerfinu.“
Hér fyrir neðan geta lesendur horft á streymi RÚV af eldgosinu í beinni: