Glenn Hoddle fyrrum þjálfari enska landsliðsins og leikmaður Tottenham telur að Harry Kane framherji Tottenham ráði för í sumar þegar hann tekur ákvörðun um framtíð sína.
Talið er að Kane skoði þann kost nú alvarlega að koma sér frá Tottenham, hann er sagður vilja eiga meiri möguleika á ferli sínum að vinna titla.
„Ég myndi ekki kenna Harry um það ef hann bæði um að fara, ef hann vill vinna titla og rétta tilboðið kemur,“ sagði Hoddle.
„Hann mun taka þessa ákvörðun og Spurs verður þá að fá bestu mögulegu lausnina, þetta væri áfall fyrir þá. Að missa gæðaleikmann eins og Kane væri áfall.“
„Ég er ekki viss um að Tottenham geti eitthvað gert ef hann vill fara. Það er undir Harry komið að taka ákvörðun, að stíga niður fæti og segjast vilja fara.“
