Donald Trump fór mikinn í ræðu sinni á fundi Repúblikana sem haldinn var á heimili hans í Mar-a-Lago í Flórída í gærkvöldi. Réðst Trump af mikilli hörku á flokksfélaga sína og kallaði Mitch McConnell, leiðtoga Repúblikana í öldungadeild Bandaríkjaþings meðal annars tíkarson.

Politico sagði frá.

Hefur Politico eftir viðstöddum að Trump hafi vikið frá fyrir fram skrifuðu handriti 50 mínútna langrar ræðu sinnar og eytt þó nokkrum mínútum í að úthúða flokksfélögum sínum í þinginu. Hann sagðist jafnframt „vonsvikinn“ með Mike Pence, en Pence var varaforseti í forsetatíð Trumps. Pence snerist gegn Trump á lokametrum forsetatíðarinnar eftir að óeirðaseggir brutust inn í þinghúsið að áeggjan forsetans. Þá mætti Pence í innsetningarathöfn Joe Biden, rétt rúmum tveim vikum eftir árásina á þinghúsið, en Trump lét sig hverfa úr Washingtonborg til Flórída þar sem hann hefur haldið síðan í janúar.

Trump mun þá jafnframt hafa gert grín að Anthony Fauci, læknisins sem leiddi viðbrögð bandarískra sóttvarnayfirvalda gegn Covid-19 faraldrinum, vænt Biden um kosningasvindl og gert lítið úr eiginkonu Mitch McConnell, sem gegndi stöðu samgönguráðherra en sagði starfi sínu lausu í kjölfar árásarinnar á þinghúsið.

Donald Trump er nú á fullum snúning að safna fé í kosningasjóð sinn sem hann notar jafnframt til þess að styðja við bakið á öðrum frambjóðendum, en Repúblikanar eiga mikið undir í kosningunum 2022. Þá er það jafnframt mikilvægt að Trump sé sýnilegur í þeim kosningum ætli hann sér að sækjast á ný eftir útnefningu Repúblikana fyrir forsetakosningarnar árið 2024.