Íslenska landsliðið er nú að koma saman í Þýskalandi fyrir fyrstu leikina í undankeppni HM 2022. Íslenska liðið varð fyrir gríðarlegri blóðtöku í gær þegar Gylfi Þór Sigurðsson afboðaði komu sína í landsleikina þrjá sem fram undan eru. Ástæðan er sú að eiginkona Gylfa á von á þeirra fyrsta barni á allra næstu dögum.

Blóðtakan fyrir Ísland er gríðarleg enda Gylfi verið yfirburðar besti leikmaður liðsins í mörg ár. Gylfi hefur verið leiðandi í markaskorun en áður var ljóst að Alfreð Finnbogason yrði fjarverandi.

Arnar Þór Viðarsson er að fara inn í sína fyrstu landsleiki og ljóst er að það gerir verkefni hans mikið mun erfiðara að hafa ekki Gylfa Þór og Alfreð til taks.

Arnar Þór ræðir fjarveru Gylfa í samtali við RÚV. „Fyrir landsliðið var þetta slæmur dagur. Gylfi þurfti að draga sig út úr hópnum. En það er nú einu sinni þannig að í lífinu eru ákveðnir hlutir sem eru mikilvægari en fótbolti og þar er fjölskyldan númer eitt. Við vissum að þetta gæti gerst því við vissum að Gylfi og eiginkona hans eiga von á barni. Við erum náttúrulega svekktir að Gylfi geti ekki verið með okkur en erum mjög ánægðir fyrir þeirra hönd að nýr kafli í þeirra lífi sé að hefjast,” segir Arnar Þór við RÚV.

Arnar segir ekkert stærra í þessu lífi en þegar börnin komi í heiminn. „Maður veit það bara sjálfur, þegar börnin mín fæddust, það er ekkert stærra í lífinu heldur en það. Það eru hlutir sem eru mikilvægari en fótbolti, þó ótrúlegt megi virðast,” segir Arnar Þór.