Hrekkjalómar í Vesturbænum virðast hafa verið iðnir við kolann að undanförnu þegar kemur að dyraötum. Hringbraut fjallaði um málið í dag en spjallað var um hrekkjalómana í Facebook-hópnum Vesturbærinn í gærkvöldi og í dag.
„Um þessar mundir finnst mér óþarflega mikið um dyrabjölluat hjá mér að degi til. Eru einhverjir aðrir að lenda í því sama?“ spurði kona nokkur sem hóf umræðuna í hópnum. Færslan hefur fengið mikil viðbrögð og kannast margir við lómana sem skemmta sér við að ýta á bjöllur og banka á hurðar í hverfinu.
Íbúar segjast hafa orðið fyrir barðinu á hrekkjalómunum en þeir virðast herja á íbúðir víðs vegar í hverfinu. „Greinilega aðal grínið,“ segir kona nokkur sem býr í nágrenni við Vesturbæjarskóla. „Gaman að heyra að dyrabjölluat sé komið aftur,“ segir svo önnur kona og aðrir gleðjast yfir því að börnin séu úti að leika sér.
Þó eru ekki allir sammála um ágæti hrekksins. Kona nokkur segist hafa lent nokkrum sinnum í krökkum sem stunduðu dyraat en hún var ekki sátt með það á þeim tíma. „Ég hef ekki orðið fyrir þessu lengi en þegar ég var að vinna á næturvöktum á spítala og vildi gjarnan sofa lengur en til hádegis þá voru stundum krakkaóféti að dingla dyrabjöllunni,“ segir konan. „Þegar ég bað þau kurteislega um að hætta því ég hafi verið nýsofnuð þá sögðu þau: Þú átt ekki að sofa á daginn, þú átt að sofa á nóttunni.“
Þá segir maður nokkur að hrekkurinn sé að verða alvarlegt vandamál í borginni. Athugasemd mannsins hefur uppskorið hlátur hjá meðlimum hópsins en ekki er víst hvort að um alvöru eða kaldhæðni sé að ræða. „Dyrabjölluat er að verða mjög alvarlegt vandamál í Reykjavík. Við svo verður ekki búið. Það þarf að bregðast við þessu af hörku,“ segir maðurinn. „Hver er ábyrgð skólanna í þessu? Hvar eru foreldrar þessara barna? Er enginn virðing borin fyrir neinu lengur?“
