Það er samdóma álit jarðvísindamanna að kvika flæði nú inn í jarðlög undir Fagradalsfjalli. Þetta kemur fram í tilkynningu á Facebook-síðu Almannavarna.
Við kvikuflæðið myndast spenna í sprungum austan og vestan við jarðskjálftasvæðið. „Þegar næg spenna hefur myndast, þá hrökkva sprungurnar og við það koma skjálftahrinur. Eftir þær kemur slökun og tímabil minni skjálfta þar til spennan verður aftur of há og svipuð hrina kemur. Gera má ráð fyrir því að ef gangurinn heldur áfram að myndast næstu daga og vikur þá megi eiga von á slíkum áhlaupum og jarðskjálftahviðum nokkrum sinnum,“ segir ennfremur í tilkynningunni.
Ekki er talið að skjálftahrina næturinnar sé skammtímafyrirboði eldgoss. Ef að gosi verður á næstunni er talið langlíklegast að gjósi á svæðinu milli Fagradalsfjalls og Keilis.
Meðfylgjandi mynd af Fagradalsfjalli tók Snorri Þór Tryggvason. Sjá má 360 gráðu mynd af fjallinu hér.
