Rodrigo Hernandez miðjumaður Manchester City er ekki þessi staðalímynd sem fólk hefur um knattspyrnufólk, hann er lítið fyrir frægð og frama, ást hans liggur í fótboltanum. Hann hefur alltaf verið svona og góð laun hafa ekki breytt honum.

Rodri sem er frá Spáni kom til Manchester City fyrir einu og hálfu ári síðan en áður lék hann með Atletico Madrid og Villarreal.

Fjölskylda Rodri hefur lagt mikla áherslu á að hann mennti sig og þegar hann var hjá Villarreal gekk hann í skóla en spilaði einnig í bestu deild Spánar.

Á meðan hann lék með Villarreal bjó Rodri á stúdentagörðum í borginni, á sama tíma var Rodri með 18 milljónir í laun á viku.

„Fólk var í áfalli þegar það sá Rodri spila í efstu deild en hélt áfram að búa á stúdentagörðum,“ sagði Valentin Henarejo vinur Rodri sem bjó með honum á stúdentagörðunum.

„Eftir fyrstu dagana í skólanum þá komst fólk að því að hann er bara venjulegur. Hann blandaði geði við alla, fólki fannst skrýtið að sjá svona stjörnu vaska upp diskana sína.“

Rodri hefur lítinn áhuga á dýrum bílum. „Þangað til nýlega þá ók hann bara um á gömlum Opel Corsa. Í raun algjör drusla,“ sagði vinur hans.

Rodri heldur áfram að ganga menntaveginn og er núna í meistaranámi í viðskiptafræði.