Enn skelfur jörð og urðu íbúar á Suðvesturhorninu varir við stóran kipp rétt um klukkan 19:00 í kvöld. Skjálftinn virtist nokkuð snarpari en þeir síðustu í dag. Sá stærsti undanfarna daga var í gærmorgun, 5.3 að stærð.
Samkvæmt tilkynningu Veðurstofunnar var skjálftinn 4.7 að stærð, sem er jafn stór og sá sem reið yfir á miðnætti í gærkvöldi.
Jarðvísindafólk sem rætt var við í fréttatímum Stöðvar 2 og RUV í kvöld virtust sammála um að ógjörningur væri að spá fyrir um framhaldið eða hversu lengi yfirstandandi hrina mun standa.
42 jarðskjálftar hafa orðið síðan á miðnætti á svæðinu yfir 3.0 að stærð, þar af voru sjö 4.0 að stærð og sá stærsti 4,7 að stærð.
Hættustig almannavarna er enn í gildi á svæðinu og er fólk beðið um að fara varlega á svæðinu, forðast fjallshlíðar þar sem grjót getur hrunið niður.
Mestu átökin eru enn á milli Fagradalsfjalls, en á töflu yfir jarðskjálfta inni á vefsíðu Veðurstofunnar, vedur.is, virðist flestir skjálftar dagsins í dag vera nær fjallinu Keili en Fagradalsfjalli. Skjálftarnir eru því að færast nær höfuðborginni en Grindavík eins og verið hefur.
Fréttin hefur verið uppfærð