Nú á lokametrum kosningabaráttunnar er ljóst að slagurinn er Demókratanna að tapa. Skoðanakannanir ættu að vera Trump og starfsfólk kosningaherferðar hans mikið áhyggjuefni og í vikunni varð ljóst að grátt bættist á svart: peningarnir eru að klárast.
Yfirburðir Demókrata í peningamálum eru algjörir þegar aðeins tvær og hálf vika er eftir af kosningabaráttunni. Þannig tilkynntu Repúblikanar í gær að þeir hefðu safnað 248 milljónum dollara í september, á sama tíma safnaði framboð Bidens og Demókrataflokkur hans 383 milljónum dollara. Sló september því fyrra met Demókrata, sem sett var í mánuðinum þar á undan.
Þannig er ljóst að sveiflur í fjárframlögum til flokkanna hafa reynst mun meiri en sveiflur í fylgi í skoðanakönnunum. Þó hefur Biden bætt við sig fylgi í svo til öllum ríkjum Bandaríkjanna.
Staða framboðanna er nú sú að Trump segist eiga um 251 milljón dala til að eyða næstu 18 daga, samanborið við 432 milljónir sem Biden búðirnar hafa úr að spila. Ljóst er að mikill aðstöðumunur er á framboðunum á þessum gríðarlegu mikilvægu lokametrum.
NPR segir að óalgengt sé að sitjandi forseti gangi verr að laða til sín fjárframlög til framboðsins, en ljóst er að margt er óvenjulegt við kosningabaráttuna núna. Ekki aðeins er Trump pólitískt ólíkindatól sem hefur leikið sér að því að brjóta hefðir og venjur í kosninga- og framboðsmálum, heldur hefur kórónuveirufaraldurinn sett sinn svip á baráttuna. Þannig tilkynnti framboð Bidens að þau myndu ekki beita aðferðum sem krefðust nálægðar. Fól það í sér að sjálfboðaliðastarf yrði takmarkað verulega og fjöldafundir útilokaðir með öllu. Trump hefur valið að fara allt aðra leið, eins og frægt er orðið.
