Á tíunda tímanum í gærkvöldi var tilkynnt um innbrot og þjófnað á heimili í Vesturbænum. Tölvu og fleiru var stolið. Á þriðja tímanum í nótt var tilkynnt um innbrot í veitingahús í miðborginni. Áfengi var stolið. Meintur þjófur var handtekinn skömmu síðar og var hann vistaður í fangageymslu.

Á áttunda tímanum í gærkvöldi sáu lögreglumenn bifreið ekið úr bifreiðastæði við Reykjavíkurveg í Hafnarfirði. Þegar ökumaðurinn sá lögregluna ók hann aftur í bílastæðið. Hann þvertók fyrir að hafa ekið bifreiðinni en hann var einn í henni. Viðkomandi er sviptur ökuréttindum ævilangt.

Fjórir ökumenn voru handteknir í nótt, grunaðir um að vera undir áhrifum áfengis og/eða fíkniefna. Einn þeirra reyndist vera sviptur ökuréttindum.

Á sjöunda tímanum könnuðu lögreglumenn ástandið á veitingahúsi í Breiðholti. Þar leikur grunur á að sóttvarnarlög hafi verið brotin hvað varðar samkomutakmarkanir.

Ofurölvi maður var handtekinn í verslun í Breiðholti í gærkvöldi. Hann hafði ítrekað verið til vandræða í stigagöngum fjölbýlishúsa. Hann fór ekki að fyrirmælum lögreglunnar og er grunaður um vörslu fíkniefna. Hann var vistaður í fangageymslu.