Ingvar Árni Ingvarsson, 44 ára gamall Reykvíkingur, hefur verið ákærður fyrir stórhættulega skotárás með Ruger-skammbyssu á heimili sínu í Vogahverfi. Atvikið á að hafa átt sér stað laugardagsmorguninn 9. mars árið 2019. Er Ingvar sagður hafa beint skammbyssu út um glugga að heimili sínu í Vogahverfi og skotið fjórum skotum að tveimur mönnum. Mennirnir eru sagðir hafa leitað skjóls á bílastæði fyrir utan heimili Ingvars.
Málið var þingfest í dag en þess er krafist að Ingvar verði dæmdur til refsingar og greiðslu alls sakarkostnaðar.
Ingvar hefur áður komið við sögu í sakamálum. Í byrjun mars var hann dæmdur í 60 daga fangelsi í Landsrétti vegna fjölda brota, meðal annars hótana í garð Dýralæknamiðstöðvarinnar í Grafarholti og innflutnings á gervi-skotvopnum, piparúða og anabólískum sterum. Árið 2000 var Ingvar dæmdur fyrir hlutdeild í stóru fíkniefnamáli.
Hótanir Ingvars í garð Dýralæknamiðstöðvarinnar í Grafarholti voru sprottnar af því að hann taldi dýralæknana hafa sýnt vanrækslu við meðferð á hundstík í eigu hans, Gloríu. Birti Ingvar hótanir sína á Facebook þar sem segir meðal annars: „Ég ætla að stúta þessum læknabeljum krepptum hnúum og þungum höggum.“
Í málinu sem nú er rekið gegn Ingvari kemur fram að hann hafði ekki skotvopnaleyfi er hann skaut úr byssunni út um gluggann á mennina tvo. Er hann sakaður um að hafa stofnað lífi þeirra í hættu en svo virðist sem þeir hafi sloppið ómeiddir þó að það sé ekki sagt berum orðum í ákærunni.
