Á sjötta tímanum í gær var ekið á 16 ára pilt á gatnamótum Háaleitisbrautar og Kringlumýrarbrautar. Ökumaðurinn stakk af frá vettvangi. Faðir piltsins flutti hann á slysadeild. Lögreglan fann bifreiðina, sem var ekið á piltinn, um miðnætti og er málið nú í rannsókn.

Á níunda tímanum í gærkvöldi gerði lögreglan húsleit í hverfi 103. Þar fundust 77 kannabisplöntur og talsvert magn af tilbúnum fíkniefnum. Lagt var hald á plöntur og efni. Sá grunaði afsalaði sér öllum búnaði til ræktunar til eyðingar.

Á þriðja tímanum í nótt var tilkynnt um mann með hnífa í hverfi 105. Hann var búinn að leggja hnífana frá sér þegar lögreglan hafði afskipti af honum. Hann er grunaður um brot á vopnalögum og vörslu fíkniefna.

Á sjöunda tímanum í gær hafði lögreglan afskipti af manni sem hafði meðal annars skemmt neyðarútgang í strætisvagni. Hann viðurkenndi verknaðinn og á von á kæru.

Fjórir ökumenn voru handteknir í gærkvöldi, grunaðir um að vera undir áhrifum áfengis og/eða fíkniefna.