Athafnamaðurinn Georg Mikaelsson hefur verið ákærður fyrir stórfelld brot gegn skattalögum og peningaþvætti. Georg, sem býr í Garðabæ og er 52 ára gamall, er eigandi fyrirtækisins Úranus sem er þekkt fyrir bílainnflutning og varahlutasölu.
Í ákæru frá héraðssaksóknara sem DV hefur undir höndum segir að Georg hafi ekki gert grein fyrir eignarhlut sínum í félaginu Georg Mikaelsson Ltd. sem er skráð og stofnað í skattaparadísinni Seychelleseyjum. Georg hafi ekki talið fram á skattframtölum sínum á árunum 2010 til 2014 fjármagnstekjur upp á rúmlega 66 milljónir króna sem eignarhluturinn færði honum. Þá hafi Georg ekki gert grein fyrir rekstrarhagnaði félagsins upp á tæplega hálfan milljarð.
Georg er því gefið að sök að vangreitt fjármagnstekjuskatt og tekjuskatt upp á samtals rúmlega 220 milljónir króna.
Hann er jafnframt ákærður fyrir peningaþvætti með því að hafa nýtt sér ávinning af þessum brotum sem nema þessari fjárhæð, rúmlega 200 milljónum, í eigin þágu.
Þess er krafist að Georg Mikaelsson verði dæmdur til refsingar og greiðslu alls sakarkostnaðar.
Ákæran var gefin út þann 18. júní síðastliðinn.
Málið verður þingfest fyrir Héraðsdómi Reykjaness þann 23. september næstkomandi.
