Ríkissaksóknari hefur áfrýjað dómi gegn Guðmundi Elís Sigurvinssyni, 21 ára gömlum manni sem sakfelldur var fyrir hrottalega árás á unnustu sína, Kamillu Ívarsdóttur, og krefst þyngri refsingar. Málið var upphaflega rannsakað sem tilraun til manndráps. RÚV greindi frá í kvöldfréttum.

Sjá einnig: Guðmundur Elís braut gegn fleiri konum – Óhugnanlegar lýsingar í Kastljósi og langur afbrotaferill

Guðmundur Elís var dæmdur í 12 mánaða fangelsi fyrir hina hrottafullu árás á Kamillu og sat aðeins inni í fimm mánuði. Hann var ákærður fyrir brot í nánu sambandi en héraðsdómari féllst ekki á að parið hefði verið í nánu sambandi þar sem þau voru ekki skráð í sambúð. Í fréttatíma RÚV var rætt við Helgu Völu Helgadóttur þingmann og lögfræðing og sagði hún vera þörf á að skerpa á skilgreiningum á nánu sambandi í lögum því fólk gæti klárlega verið í nánu sambandi án þess að vera í sambúð.

Dómur fyrir alvarlegt brot í nánu sambandi getur verið allt að 16 ára fangelsi.

Guðmundur Elís er einnig grunaður um líkamsárás á móður sína og er það mál í rannsókn.

Hann á að baki langan feril ofbeldisbrota gegn konum. Þá hefur hann margfaldlega brotið nálgunarbann sitt gagnvart Kamillu en hann hafði samband við hann 122 sinnum á meðan hann sat í gæsluvarðhaldi í fangelsinu á Hólmsheiði.