Breski áhrifavaldurinn Honey Ross sakar Instagram um að hata feita líkama. Hún gerir það eftir að Instagram bannaði bikinímynd af henni.

Honey Ross er 23 ára áhrifavaldur og aktívisti sem breiðir út boðskap jákvæðrar líkamsímyndar. Hún deildi nýlega mynd af sér í bikiní en Instagram hefur fjarlægt myndina vegna þess að hún „brýtur gegn viðmiðunarreglum samfélagsmiðilsins.“

Honey fékk þau svör frá Instagram að miðillinn leyfir ekki „nekt eða kynferðislegar athafnir, ofbeldi eða hatursorðræðu, áreitni og einelti.“ Það var þó ekkert að ofantöldu á myndinni sem var fjarlægð.

Hún deildi skjáskoti af tilkynningunni og spurði Instagram: „Af hverju segið þið ekki bara að þið hatið feita líkama?“

Honey deilir reglulega myndum af sér léttklæddri eða bikiní. Hún deildi til að mynda tveimur myndum frá sér í Bláa lóninu og er nakin á einni myndinni. Instagram hefur þó ekki fjarlægt þá mynd.

https://www.instagram.com/p/BwjjDreFDYR/

Foreldrar Honey eru breski spjallþáttastjórnandinn Jonathan Ross og handritahöfundurinn Jane Goldman.