Héraðssaksóknari hefur ákært þá Arnar Björnsson og Sturla Frey Gíslason fyrir meiriháttar brot gegn skattalögum og fyrir peningaþvætti. Eru mennirnir sagðir hafa ekki skilað inn virðisaukaskatti sem þeir innheimtu á árunum 2016 og 2017.

Arnar var stjórnarformaður byggingafélagsins JB Byggingar, sem nú er afskráð. Sturla var skráður framkvæmdastjóri félagsins. Upphæðirnar nema á árinu 2016 rúmum tveimur milljónum og tæpum 14 milljónum á árinu 2017.

Þá eru mennirnir ákærðir fyrir að hafa ekki staðið skil á staðgreiðslu opinberra gjalda vegna launa starfsmanna fyrirtækisins. Nema upphæðirnar samanlagt um 40 milljónum, eða 13,8 milljónum hvað varðar Arnar og 14,3 milljónum hvað varðar Sturla.

Samtals nema því skattsvikin um 56 milljónum. Enn fremur eru mennirnir ákærðir fyrir peningaþvætti fyrir að hafa aflað JB Byggingum ehf. ávinning af brotum og nýtt ávinning félagsins í rekstur félagsins og „eftir atvikum“ í eigin þágu.

Málinu verður þinglýst á fimmtudag í Héraðsdómi Reykjavíkur.