Lars Seier Christensen, danskur auðmaður og forstjóri Saxo Bank í Danmörku, varð fyrir því óláni ekki alls fyrir löngu að missa farsíma sinn í sundlaugina þar sem hann flatmagaði í sólinni á Marbella á Spáni.
Í viðtali við Børsen í Danmörku segir Lars frá þessu en umræddur sími geymdi kóða með eignarhaldi hans á Bitcoin-sýndarmyntinni. Þetta var á þeim tíma þegar gengið Bitcoin var ekki í sömu hæðum og það er í dag, en þó hljóp verðmæti myntarinnar þegar slysið varð á nokkrum tugum milljóna.
Gengi Bitcoin hefur hækkað gríðarlega undanfarin misseri – þó örlítið hafi gefið á bátinn á dögunum – og næmi verðmæti myntarinnar sem Lars tapaði líklega nokkrum milljörðum króna.
„Við sátum við sundlaugarbakkann og nutum lífsins þegar ég missti símann af borðinu og ofan í laugina,“ segir Lars sem hafði ekki tekið afrit af kóðanum sem geymdi upplýsingarnar. Lars segist ekki hafa grátið það sérstaklega þó hann hafi tapað umtalsverðum fjárhæðum þennan örlagaríka dag, enda hefur hann aldrei liðið skort hvað peninga varðar. Eftir að gengi Bitcoin hækkaði upp úr öllu valdi hugsaði hann þó með sér að það hefði kannski verið gott að eiga afrit.
Þess má geta að skömmu eftir þetta slys keypti Lars Bitcoin-mynt fyrir um eina milljón danskra króna og seldi hana svo aftur með miklum hagnaði fyrr á þessu ári.