Hvað gerist þegar þrír menn sem eru augljóslega af erlendum uppruna reyna að komast inn á skemmtistaði í miðborg Kaupmannahafnar?

Þetta var viðfangsefni rannsóknar sem þrír karlmenn af tyrkneskum uppruna framkvæmdu í miðborg Kaupmannahafnar í Danmörku í janúarmánuði síðastliðnum. Laugardagskvöldið 7. janúar fóru mennirnir út og voru þeir með faldar myndavélar á sér. Var markmiðið að kanna hvort eitthvað væri hæft í þeim orðrómi að gestum skemmtistaða og bara væri mismunað vegna kynþáttar eða útlits.

Það er skemmst frá því að segja að þetta hafi verið ferð til fjár fyrir þremenningana því mennirnir hafa nú fengið dæmdar 10 þúsund danskar krónur, um 165 þúsund krónur, í bætur vegna þeirrar mismununar sem þeir urðu fyrir.

Í minnst tvö skipti var mönnunum meinuð innganga á skemmtistaði vegna útlits síns. Á einni upptökunni mátti til dæmis sjá þrjá snyrtilega danska karlmenn ganga inn á stað, þar sem þeir voru boðnir velkomnir, en þegar þremenningarnir reyndu að komast inn var þeim neitað. Og það gerðist þrátt fyrir að mennirnir væru snyrtilega klæddir eins og dönsku mennirnir rétt á undan.

Nefnd sem fjallar um jafnrétti í Danmörku, Ligebehandlingsnævnet, fjallaði um mál mannanna eftir að þeir kvörtuðu og féll úrskurður á dögunum. Mönnunum var mismunað og fengu þeir því greiddar bætur.