Þetta segir Gísli Einarsson, fjölmiðlamaður og stjórnarmaður hjá knattspyrnufélaginu Skallagrími, í samtali við Fótbolta.net í dag. Málið sem um ræðir varðar leikmann Samherja en leikmaðurinn er sagður hafa skyrpt á leikmann Skallagríms í leik liðanna í fjórðu deildinni í gær. „Leikmaður Samherja hrækir á okkar leikmann og dómari dæmir ekkert. Stay classy fjórða deild,“ skrifaði Guðjón Gíslason, forráðamaður í liðsstjórn Skallagríms, á Twitter-síðu sína eftir leik liðsins gegn Samherjum.
„Það liggur fyrir að þetta gerðist og það er mjög undarleg fullyrðing og ásökun sem felst í orðum þjálfarans um að þetta sé kjaftæði. Enda eru fjölmörg vitni úr báðum liðum,“ sagði Gísli um málið „Leikmaðurinn frá Samherja bað okkar leikmann afsökunar í þrígang sem hann hefði varla gert ef hann hefði ekkert til saka unnið. Okkar leikmaður talaði við dómarann strax eftir atvikið og annar leikmaður talaði á sama tíma við aðstoðardómarann. Svo talaði enn annar við aðstoðardómarann eftir leik.“
Gísli segir það vera fjarri lagi að dómarar leiksins hafi ekki vitað af málinu en Sinisa Pavlica, þjálfari Samherja, sagði að dómarinn hafi ekki heyrt neitt frá Skallagrími um atvikið. Gísli segir að dómararnir hafi í raun vitað af málinu en þar sem þeir sáu ekki málið höfðu þeir vissulega ekki forsendur til að grípa til aðgerða. Gísli vill þó að það menn læri af þessu í ljósi COVID-19 faraldursins.
„Við biðjum menn að hafa það í huga að svona gerir maður ekki og sér í lagi þegar ástandið er eins og það er. Við óskum eftir að menn láti þetta verða sér víti til varnaðar. Við búum heldur ekki til sögur um leikmenn og að sitja undir því er óþolandi. Eðlileg viðbrögð þjálfara Samherja hefðu verið að biðjast afsökunar.“