Kara Kristel Ágústsdóttir hefur skotist upp á stjörnuhimininn á samfélagsmiðlum í haust. Kara sem er 22 ára gömul hóf að blogga um reynslu sína af kynlífi, segja sögur og gefa ráð á síðunni Kristelkara.com fyrir tveimur mánuðum síðan. Skömmu varð hún fastur liður hjá útvarpsþættinum Brennslunni á FM957. Hún kemur þar fram með sérstakt kynlífshorn á hverjum fimmtudegi. Þá er hún vinsæll Snappari með notendanafnið:karaagusts. Hún biður lesendur sína, hlustendur og áhorfendur sína þó ekki að taka öllu of alvarlega sem hún segir, því að þetta sé gert í gríni og að eigin sögn „til að lýsa upp skammdegið.“
Í desember er Kara með kynlífsstellinga jóladagatal á Snapchat þar sem fylgjendur hennar eiga að fylgja leiðbeiningunum í kynlífi.
Í samtali við DV segist Kara hafa um 2000 fylgjendur á Snapchat og 123 þúsund manns hafa heimsótt vefinn síðan hann opnaði 6. október. Hvernig hafa viðbrögðin við jóladagatalinu verið? „Mjög góð. Fólki finnst þetta mjög fyndið.“ Er fólk að fylgja leiðbeiningunum? „Já. Fyrir nokkrum dögum síðan var ég að djóka með það í dagatalinu að maður ætti að stunda kynlíf á nóttunni því þá væri sæðið sofandi og engin hætta á að verða óléttur. Ég þurfti að draga það til baka af því að of margir voru að trúa því.“
Kara setur dagatalsfærslurnar inn á kvöldin því þá hefur hún mestan tíma. Vika er liðin og Kara búin að sýna fólki ýmislegt, til dæmis hvernig á að gera ákveðnar stellingar í sófa og á eldhúsbekk með uppþvottavélina í gangi. „Ég er ein í þessu og leik bæði gaurinn og gelluna. Ég var til dæmis í ræktinni um daginn og þar var ég að athuga hvaða tæki gætu virkað í kynlífi.“
Hefur þú fengið einhver leiðinda skilaboð á Snapchat eða annars staðar út af því sem þú hefur verið að segja og skrifa? „Enginn segir neitt beint við mig. Ég hef lesið slíkt í kommentakerfunum og svoleiðis en ég tek það ekkert nærri mér. Ég er búin að vera vikulega í Brennslunni og fólk sem hlustar á það veit að þetta er bara djók.“
Þegar fylgjendur Köru opnuðu „gluggann“ á jóladagatalinu sínu í gær, 7. desember, beið þeirra sturtukynlíf. Hún segir: „Allir eiga að fara í sturtu. Sturtukynlíf getur verið svolítið fyndið. Það getur verið gott, vandræðalegt, fyndið…..maður getur dottið. Það er ógeðslega margt sem getur gerst þegar maður er að ríða í sturtu.“
Þá segir hún frá sturtuferð sem hún var nýkomin úr, einsömul, þar sem hún fann G-blettinn sinn. Hún flýtti sér og lét vinkonu sína vita af því að bletturinn væri ekki goðsögn. „Án djóks, ég hélt að G-bletturinn væri eitthvað bull. Maður er með sníp og fær fullnægingu þar. En núna veit ég það, ég fann minn“ segir Kara hlægjandi í dagatalinu. „Í dag ætla allir að ríða í sturtu sem eru saman, en hinir sem eru ekki með maka eiga að gjöra svo vel að finna G-blettinn sinn. Hann er til.“
