15 ára piltur lést í vikunni af völdum svartadauða. Hann bjó í Gov-Altaj í Mongólíu og hafa yfirvöld nú gripið til umfangsmikilla lokana víða um landið til að koma í veg fyrir að sjúkdómurinn breiðist út. Talið er að pilturinn hafi smitast við að borða hrátt kjöt af múrmeldýri.

Tveir aðrir hafa greinst með sjúkdóminn í Mongólíu. Þeir eru úr næsta héraði við Gov-Altaj, Khovd. Íbúum í fimm héruðum á svæði á landamærum Mongólíu og Kína hefur verið gert að vera í sóttkví vegna smitanna. Sky News skýrir frá þessu.

Svartidauði smitast með flóm á milli dýra. Fólk getur smitast ef flær bíta það. Það er hægt að lækna sjúkdóminn með sýklalyfjum en ekkert bóluefni er til.

Alþjóðaheilbrigðismálastofnunin WHO segir að fullorðinn manneskja geti látist á fyrstu 24 klukkustundum smits ef hún fær ekki sýklalyf.