Róbert Marshall er nýr upplýsingafulltrúi ríkisstjórnarinnar. Hann fann fyrir djúpri köllun til að gera samfélaginu gagn eftir að horfa yfir Ermarsundið þar sem afi hans lést í stríðinu. Róbert er í forsíðuviðtali í nýjasta helgarblaði DV. Við grípum hér niður í viðtalinu:
Með fram þingmennskunni var Róbert mikið að leiðsegja og fór síðan á fullt með eigin rekstur þegar hann ákvað að hætta þingmennsku árið 2016. „Ég var forvitinn um hvort það væri hægt að lifa af verkefnum tengdum útivistinni og það tókst. Við höfum sinnt ýmiss konar leiðsögn fyrir Ferðafélag Íslands og séð um þjálfun Landvætta. Þá ákvað ég að nýta þekkingu mína úr fjölmiðlun og dagskrárgerð, við Guðmundur Steingrímsson gefum út tvisvar á ári útivistartímaritið Úti og við Brynhildur [Ólafsdóttir, eiginkona Róberts] og Tómas Marshall bróðir minn gerðum útivistarþætti fyrir RÚV.
Þegar ég hætti á þingi ákvað ég að gera upp við mig árið 2020 hvað ég ætlaði að verða þegar ég yrði stór,” segir Róbert kíminn og heldur áfram: „Ég fann strax í haust að það var farið að toga í mig að skipta um vettvang. Þegar ég byrjaði að vinna í stjórnarráðinu fann ég hvað ég saknaði þess að vera á eiginlegum vinnustað. Ég og Brynhildur erum bara með sitthvora skrifstofuna heima og auðvitað hittum við mikið af fólki þegar við erum að þjálfa og leiðsegja en ég fann hvað ég hafði gott af þessari breytingu – að vakna á morgnana, fara út, sinna vinnunni og koma síðan heim. Ég hef alltaf verið pólitískt „animal” og mikill áhugamaður um stjórnmál. Ég var satt að segja farinn að finna fyrir samviskubiti yfir því að vera ekki að gera neitt fyrir samfélagið. Mér fannst ég vera kominn inn í einhverja búbblu þar sem ég væri ekki að gera gagn. Að mörgu leyti fannst mér ég hafa verið ágætis þingmaður og verið sterk rödd á ákveðnum sviðum.“
Viðtalið í heild sinni má lesa í nýjasta helgarblaði DV.
Íslenskar konur fara ekki í felur með kómísk vandræði sín með brúnkukrem og voru ófáir húmoristar til í að deila sprenghlægilegum sögum af vandræðum sínum.
„Kast! Erum að flytja um mánaðamótin og nú er bara að borða út úr skápum og nota það sem til er. Ákvað að fríska upp á mig með brúnkuspreyi sem ég hef átt mjög lengi. Ég gáði ekki að mér og þegar ég opnaði augun var ég mosagræn á lit. Spreyjaði þá í vaskinn og jú, jú, löngu útrunnið kremið og sjóveikigrænt á lit,“ rifjar Friðrika Kr. Stefánsdóttir upp, og það er stutt í hláturinn.
Sjáið myndir af áhugaverðum brúnkumistökum í blaðinu.
Gasljóstrun (e. gaslighting) er mjög alvarlegt andlegt ofbeldi þar sem ráðskast er með skynjun þolandans á þann hátt að hinn síðarnefndi fer að efast um skynjun sína, minni og jafnvel geðheilsu.
„Stærsta og algengasta birting gasljóstrunar er að ofbeldismenn kenna alltaf brotaþolanum um ofbeldið sem viðkomandi verður fyrir,“ segir Jenný Kristín Valberg, ráðgjafi hjá Kvennaathvarfinu. Jenný bjó sjálf við alvarlegt ofbeldi í 13 ár og hefur verið ötull talsmaður gegn ofbeldi.
Jenný biðlar til þeirra kvenna sem telja minnsta vafa á að þær séu beittar ofbeldi að hringja í Kvennaathvarfið í síma 561 1205.
Fastir liðir eru að sjálfsögðu á sínum stað, svo sem fjölskylduhornið, Eldað með Unu, krossgátan, Tímavélin og margt fleira.
