Það var heit umræða í boði í hlaðvarpsþættinum Dr. Football í dag þar sem þrír sérfræðingar fóru yfir málin.
Hjörvar Hafliðason, Mikael Nikulásson og Kristján Óli Sigurðsson fóru yfir leik KR og Víkings R. um helgina sem lauk með 2-0 sigri KR.
Þrír leikmenn Víkings fengu rautt spjald og þar á meðal fyrrum landsliðsmaðurinn Sölvi Geir Ottesen.
Pablo Punyed ýtti í bakið á Sölva sem fór með hendina í andlit leikmanns KR í kjölfarið og uppskar rautt spjald.
Hjörvar telur að Sölvi hafi ekki slegið til leikmannsins viljandi en Mikael er hins vegar á öðru máli og vill meina að Sölvi hafi vitað hvað hann væri að gera.
,,Það er bara ýtt í bakið á honum. Ef Stjáni myndi kasta þér yfir borðið beint í andlitið á mér þá skallaðir þú mig ekki,“ sagði Hjörvar.
,,Af hverju ætti Sölvi að vilja setja olnbogann í einhvern gutta? Hann veit ekki einu sinni hver hann er.“
Mikael svaraði í kjölfarið og er alveg viss í sínu máli að Sölvi hafi vitað hvað hann væri að gera í hita leiksins.
,,Ef Stjáni myndi ýta aðeins við mig þá myndi olnboginn ekki fara af fullum krafti í andlitið á þér.“
,,Þetta var rautt spjald. Það var eitthvað ýtt í hann en þú sérð hvernig hann fer með olnbogann í hann.“
,,Ég man ekki eftir að hafa sett hendurnar í andlitið á neinum þótt mér hafi verið ýtt. Þú ræður víst við hendurnar á þér, horfðu á þetta aftur, þetta var rautt spjald.“
Kristján var sammála Mikael og vill meina að spjaldið hafi ekki verið verðskuldað.
,,Mér finnst þetta ekki vera rautt. Þetta er bara slys. Sölvi er reyndari en það að hann fari að lemja menn viljandi þegar dómarinn stendur meter frá honum.“
