„Nú á dögum standa vonir til að við séum á tímamótum. Hingað og ekki lengra heyrist um heim allan,“ sagði Guðni Th. Jóhannesson forseti í ávarpi sínu þegar Alþingi var sett fyrr í dag. Vísaði Guðni þar í #metoo byltinguna svokölluðu sem tröllriðið hefur samfélagsmiðlum undanfarnar vikur og leitt til þess að þúsundir íslenskra kvenna hafa stigið fram og tjáð sig um reynslu sína af kynferðisáreitni, valdamisbeitingu og ofbeldi.

„Skömmu fyrir þingsetningu fordæmdu nýkjörnir alþingismenn kynferðislega áreitni og ofbeldi. Hvar vetna heyrast sömu raddir,“ sagði Guðni og bætti við að boðskapurinn sé einfaldur og skýr: hingað og ekki lengra.

„Yfirgangur verður ekki lengur liðinn, við verðum að hlusta og gera betur, við sem búum saman í þessu samfélagi.
Málstaðurinn er það sterkur, þörfin það brýn.

Þrátt fyrir allt okkar ósætti, allar okkar ólíku hugsjónir skulum við standa saman um grundvöll okkar samfélags. Réttarríki og mannréttindi, víðsýni, umburðarlyndi og einstaklingsfrelsi, samkennd og samúð, jafnrétti, velferð og vernd allra gegn hvers kyns ofríki og aðkasti.“