Reykjavíkurmaraþon Íslandsbanka er löngu orðið fastur liður í sumardagskrá Reykjavíkurborgar. Nú hafa skipuleggjendur birt auglýsingu Íslandsbanka tengda maraþoninu en hennar hefur alla jafna verið beðið með mikilli eftirvæntingu.

Segir í tilkynningu frá skipuleggjendum maraþonsins:

Ný Reykjavíkurmaraþonauglýsing Íslandsbanka lítur nú dagsins ljós en maraþonið er stærsta góðgerðarsöfnun landsins. Í fyrra söfnuðust 167 milljónir sem runnu óskiptar til góðgerðarfélaga en frá því Hlaupastyrkur fór í loftið árið 2006 hafa alls safnast yfir 990 milljónir. Auglýsingin í ár er skrifuð og framleidd af Íslandsbanka og framleiðslufyrirtækinu Purki en leikstjórn var í höndum Hannesar Þórs Halldórssonar, landsliðsmanns í knattspyrnu. Áherslan í ár er á söfnunina en það geta allir tekið þátt með því að safna fyrir góðgerðarfélag eða heita á hlaupara. Reykjavíkurmaraþon Íslandsbanka fer fram 22. ágúst næstkomandi en verður með breyttu sniði að teknu tilliti til fyrirhugaðra afléttinga á samkomubanni. Breytingar á fyrirkomulagi hlaupsins voru unnar í samstarfi við Almannavarnir.

Maraþonið fer fram 22. ágúst. Hægt er að heita á maraþonhlauparana á hlaupastyrkur.is og styrkja þar með gott málefni. Sjá má auglýsinguna hér að neðan.