Sýklalyfið Hýdroxíklórókín er talið auka líkur á andláti sjúklinga. Alþjóðaheilbrigðsmálastofnunnin hefur stöðvað tilraunir á notagildi lyfsins tímabundið vegna þessa.
Alvogen tilkynnti í lok marsmánaðar að fyrirtækið ætlaði sér að gefa Landspítala 50 þúsund skammta af lyfinu til að gefa COVID-19 sjúklingum en skortur hafði verið á lyfinu hérlendis.
Forstjóri Alvogen, Róbert Wessmann, sagðist telja að lyfið yrði mjög eftirsóknarvert í faraldrinum þar sem notkun þess hefði lofað góðu. „Þetta lyf er búið að vera á markaði í áratugi. Læknar ávísa lyfinu, það eru aukaverkanir í sirka hálft prósent tilvika og það er yfirleitt fólk með undirliggjandi sjúkdóma. Þannig að við treystum læknum til að fara vel með þetta. En það er alveg klárt að það er mjög gott fyrir Ísland og Íslendinga að eiga þennan lager og geta gengið að honum,“ hafði Vísir eftir Róberti í apríl. Alvogen framleiðir ekki lyfið.
Samkvæmt rannsókn á notagildi Hýdroxiklóríkíns sem var birt fyrir helgi er dánarhlutfall sjúklinga sem fengu lyfið hærra en meðal þeirra sem ekki fengu það.
Magnús Gottfreðsson, prófessor og yfirlæknir á Landspítalanum, sagði í samtali við Vísi í dag að notkun lyfsins hefði verið hætt hér á landi fyrir nokkru síðan. Innan við 200 einstaklingar hafi fengið lyfið hér á landi og var fylgst vel með þeim öllum í kjölfarið.
